Gulnaz Karataş (Bêrîtan) Bi eslê xwe ji Dêrsimê bû, lê di sala 1971’î de li Çewlikê hate dinê û li wir mezin bû. Di sala 1989`an de li zanîngeha Stenbolê fakulteya Zanistî û Bazirganî beşa îngilizî dest bi xwendinê kiribû. Di newroza heman salê de fêr bibû ku ew jî keçeke kurd e. Di tevahiya jiyana xwe de miroveke serkeftî bû. Di jiyanê de çalak û bêhempa bû. Ji biçûkatiya xwe heta ku beşdarî nav refên PKK’ê bibe jî ew wisa berdewam dike. Di sala 1990’î de bi destgirtiyê xwe re beşdarî refên gerîla bibû û di cotmeha sala 1992’yan de jî beşdarî şerê Başûr bû.

Bû sembola jina azad
Bêrîtan di sala 1992’ê de wek fermandara taximê derbasî Şemzînanê bû. Pir bi heyecan bû û yekem car li vir birîndar bû. Birîn li rûyê wê bibû. Bi vê birîna xwe ya biçûk pir serbilind bû. Ji lew re bi serberzî nîşanê hevalên derdora xwe dida û ji wan re wiha gotibû; binêrin ez çawa xweşik û bedew bûme.
Bêrîtan tevî ku birîndar bû jî, guh neda kesî û bi israr tevli şerê Başûr ê di 24’ê cotmeha sala 1992’yan bû. Şer bi dijwarî dewam dikir. Ew û hevalên xwe ketibûn çembereke şer û ev çember her ku diçû tengtir dibû. Bêrîtanê wê fîşekên xwe yên dawî ji bo xilaskirina hevalên xwe bi kar bianiya.
Diviya her tişt hêjayî gerîlatiyê bûya. Dema fîşekên wê qediyan bersiva wê ya ji bo bangawaziya teslîmbûnê jî cuda bû. Bêrîtanê di 25’ê cotmeha sala 1992’yan de xwe ji tat û zinarên bilind ên Lolanê avêt xwarê û dawî li jiyana xwe anî û di xeta Rêber Apo de bû sembola jina azad. Li dijî hemû xirabiyan, qetlîam û zora li ser Dêrsim û hemû Kurdistanê, nimûneyeke îsyanê bû.

Keseke bi îdia bû
Çalakiya Bêrîtanê ne tenê bi aliyê şer, xeta berxwedaniyê di têkoşîna me de felsefeya jiyanê û rêgeza wê ye. Çalakiya Bêrîtanê, îdia, bawerî, sekinandina wê ya jiyanê û biryara wê ya azadiyê destnîşan dike.
 Bi taybetî jî xeta Bêrîtanê peywîra fermandariya jinê ya ku divê di jiyanê de pê ve rabe, bi rengekî aşkera bilêv dike. Bêrîtan di fermandariya jin û zilam de nêzîkatiyên şaş ên ku heye li dijî wan heta dawî têkoşîn daye. Di xeta parastina rewa de biryardarî û hêza jinê ya cewherî ye. QENDÎL

Ew teslîm nebû

Ev helwest û çalakiya Bêrîtanê tesîreke mezin him li ser gelê kurd him jî li ser hêzên kevneperest kir. Serokê Rêberê Gelê Kurd Abdullah Ocalan Bêrîtan wekî mînak nîşan da û got: “Ev Jeanne d’Arc a me ye.” Ocalan, bi bîr xist ku di sala 1992’yan de PDK, YNK û Tirkiyeyê bi hev re li hemberî hêzên PKK’ê li herêma Kurdistana Federal operasyonek li dar xistine. Ocalan, got ku Gulnaz Karataş a (Bêrîtan) a ji bo bi saxî nekeve destê hêzên YNK’ê xwe ji zinarê avêtibû û wiha got: “Şehîdek me bînim bîra we. Şehîd Bêrîtan. YNK’yî li kêleka zinarekî Bêrîtanê dorpêç dikin. Dora wê digirin. Jê re dibêjin ‘teslîm bibe’, lê dema dibêjin, bi niyeta ‘em ê te teslîmî Tirkiyeyê bikin’ nabêjin, jê re dibêjin ‘were, em bira ne, em ê li te îşkence nekin, were, tenê di nav me de bimîne’. Lê Bêrîtan dizane ku ev ne rast e. Bêrîtan azadiya xwe dixwaze û vê bangewaziyê bi rûmeta xwe naxe. Û xwe ji zinaran de davêje xwarê. Bêrîtan, xwedî azadiya bêdawî û xeta Serokatiyê bû. Tiştê ku ji bo min girîng e, şerê xeta Bêrîtan e. Ez nikarim bibim leşkerê tu kesî. Têkoşîna min, têkoşîna azadiyê ye.”

Fîlmê Bêrîtan

Derhêner, rojnameger, kameraman û gerîla Halîl Uysal di nav sînemaya kurdan de xwedî cihekî girîng bû û li cîhanê hindik mînak hene ku gerîla fîlmekî wiha serketî bikişîne. Uysal bi navê ‘Bêrîtan’ fîlmeke metrajdirêj kişand. Sala 2004’an senaryo hat nivîsandin, di sala 2005’an de dest bi kişandina fîlmê hate kirin û fîlm di 2006’an de hat nîşandan. Di fîlmê de jiyana gerîlaya PKK’ê Gulnaz Karataş (Bêrîtan) cih girtibû. Fîlm di nava raya giştî de dengekî bilind veda û hate ecibandin. Halîl Uysal ji bo xeyal û jiyana gerîla vebêje kete ser rê û li pey xeyalên xwe tevli refên şehîdan bû.