Çend rojan berê em li Enstîtuya Kurdî Li Almanya bûn.
Me dîsa weke gelek caran li ser zimanan bi giştî û bi taybetî li ser zimanê kurdî guftûgo dikir.
Şagirteke kursa zimanê kurdî keçeke alman jî beşdarî sohbeta me bû û got; Zimanê Kurdî Zimanekî Berxwedanê ye.
Em pêşî gelek hayîdar nebûn, lê wê keça alman, bi israr û jixwebawer ew biwêj dubare û sêbare kir. Nîv almanî, nîv îngilîzî û nîv kurdî û taybetî jî bi awirê xwe jî li peyvên xwe xwedî derdiket.
Li ser vê helwesta tund bi carekê bala me hemiyan çû ser van gotinên watedar.
Piştî hinek sohbeta din, me dît ku ev kes ne bi hestiyarî û ne ku hema ji bo me dilxweş bike van gotinan dibêje. Belê bi zanistî diaxive û li ser hinek lêkolînan gihiştiye vê encamê.
Helbet em jî, yên li wir amade, vala nesekinîn. Hema me jî dest pê kir serê xwe xurand û li ser hinek sermayeya xwe ya zanebûnê, qasî ku heye, ketin nava lêgerîn û lêkolînê.
Erê me dît ku, em gelek ji van gotinan ne dûr in û me jî pir caran li ser naveroka vê biwêjê axavîn.
Rast e, gelê me bi hezar salan di bin destê deshilatdaran de jiya ye. Her kesî, mal û milk û keda gelê me dizî ye û talan kiriye. Lê belê tiştekî me yê pir hêja û bi rûmet heye, ku ji me dizî ye û sed heyf û mixabin tew em bi xwe jî ne hesiyan in; ev jî ZIMAN, ÇAND û HUNERa me ye
***
Mijara girîng/muhim di vir de ev e ku, ligel vê dizî û talanê – ku ev malxirabî û malwêranî ji Îskender dest pê dike û heta roja îro berdewam dike – lê dîsa ev ziman û çand nikaribû bihata windakirin û tunekirin.
Me ev mijar pirtir bi xurtiya ziman û çanda kurdan girê dida. Erê me bi qehremanî û anûr û berxwedaniya gelê kurd jî ve girêdida, lê ev alî hinekî lawaz dima. An jî weke şiarekê/dirûşmekê û bi zanistiyeke xurt nedihat neqişandin. Weke ku hate gotin: Zimanê Kurdî Zimanê Berxwedanê ye!
Ziman, neynika mejî ye. Ziman, fikir û raman a bi deng e. Mejî, bi ziman dibe deng, dibe peyv, dibe biwêj, dibe nivîsandin, dibe çand û bi vî awayî ji takekesî dibe pir kesî/civakî û dibe malê gel/netew.
Xurtbûna ziman û çand û hunera gelekî, xurtbûna berxwedana wî gelî jî dide diyarkirin.
Ji ber vê hêza mezin e ku, vê xakê û vî miletî dikaribû dergûştî ji mirovatî û şaristaniya cîhanî re bikira.
Ev berxwedana îro jî, ku dikare xwe ragire, li hemberî ewqas dewletên dagirker ên xwedî teknolojiya bilind a modern û kevneperestiya cîhanê, hêza xwe ji wê bingeha dîrokî distîne.
Bi Kawayê Hesinkar û Rustemê Zal û hwd. dest pê kiriye û gerîlayên îro berdewam dike.
Loma hêjaye ku, ew kampanya TZP’ê dest pê kiriye û pêşkêştiyê jê re dike, bi vê dirûşma sernivîsê em hîn bi xurtî piştgiriyê bikin û heta negihêje armanca xwe ya bingehîn em dev jê bernedin.
Em dilxweş bin ku, em xwedî zimanekî wisa berxwedar in.
Zimanê Kurdî Zimanê Me Ye, Zimanê Kurdî Rûmeta Me Ye!

ZIMANÊ KURDÎ ZIMANÊ BERXWEDANÊ YE!