| |
| Eklenme Tarihi: 13.10.2008 Saat: 15:55 |
|
|
Dema serokwezîr û berpirsên komara Tirkiyeyê tên Ewropa, rojnameya Azadiya Welat jî dixin bin çingilê xwe û dibêjin: “Ha babam li memleketê me demokrasî heye, zimanê kurdî azad e, em xwedî dewleteke demokrat in, kî dibêje tirk bêmedeniyet in…”.!!!
Bi van gotin û kiryarên sexte ew dixwazin di vê sedsala satalît û înternetê de jî raya giştî bixapînin. Hemû armanca wan ew e ku kilîla deriyê welatên yekîtiya Ewropayê bikeve destê wan. Piştre ew ê çi bikin? Zaten ji karê wan yê niha de xuyaye: Sedî 100 ew ê hemû prensîbên bav û kalên xwe yên dûr ji exlaqê mirovahiyê hema mîna berê bidomînin.
Rejîma dagirker a Tirkiyeyê ev çend meh e ku dîsa jî amadekariyên şer û operasyonên mezin dike. Berê rojnameya tirkî ku li ser pirsgirêka kurdan dinivîse, tê berbendkirin, niha jî Azadiya Welat ji weşanê diwestînin. Li bakurê Kurdistanê tiştek bi navê zagona dewleta navendî tuneye. Di navbera Wan û Bursayê da ferqên mezin hene. Dema mirov ji Antalya û Enqereyê diçe bajarên Kurdistanê, mîna wê hindê ye ku çûye welatekî din yên cuda!! Carna li Gever û Colemêrgê rojek du rojan xeta telefonan tê birîn û bêdengî atmosfêrê welat dadigire. Temaşekirina TV’yên satalîtê pir bi zehmet e û bi giştî rayedarên T.C dixwaze netewa kurd ker, lal û kor bin. Gelo di vê cîhana îro de ma karekî wiha mimkûn e? Lê ew jî mîna padîşahên Fransî yên sedsala 17’an ji rojname û pênûsa azad ditirsin, diricifin û çareseriyê di serkutkirin û berbendkirinê de peyda dikin!!. Ji aşkerebûna sir û razên xwe yên veşartî ditirsin. Ew dizanin ku êdî Amed bûye kela demokrasîxwazan, bûye kilîla vekirina cîhaneke nû ji hemû azadîxwazan re. Ew dizanin ku Amed paytexta kurdan a manewî û siyasî ye, hemû saziyên kurdan li wir kom bûne û kiryarên dewleta dagirker aşkere dikin. Ew naxwazin kes rûreşiyên wan û rayedarên komara Tirkiyê bên dîtin. Ew dizanin ku qedera Kerkûk û Diyarbekirê bi hev re girêdayî ye. Ji bona wê jî ew ê dest bi her karekî bikin ku kurd li ser bîr û xweziyên xwe yên siyasî-dîrokî nebin yek û di pratîkê de tiştekî nekin.
AKP demeke ku dibêje ew ê kela kurdan Amedê jî bêxin bin kontrola xwe. Bi navê ol û dînê sexte di nava gel de propagandeyên xwe dikin. Ew dizanin ku rojnameya Azadiya Welat di aşkerekirina çewtiyên wan ên siyasî û bilindkirina sewiya rewşenbîriya gel de roleke pir dîrokî û aktîv dilîze, ji bo wê jî bi du armancan weşandina rojnameya kurdan a herî populer li Tirkiyeyê berbend dikin:
1. Ew dîsa amadekariyên operasyonekê dikin ku başûrê Kurdistanê jî digire nava xwe. Ew ê hewl bidin ku dîsa berê kurdên Başûr û Bakur bidin hev. Dîsa dixwazin ji bo armancên xwe kurdan mîna meymûnan bireqisînin.
2. Hilbijartinên şaredariyan nêzîk in û bi karekî wiha re çavsoriya xwe nîşanî DTP, rewşenbîr û saziyên kurdan didin ku gel ji wan bireve.
Bi wan hemû îdiayên ku AKP li ser azadî û demokrasiyê dike, siyaseteke wiha 180 dereceyî dûr e ji rastiyê. Lê êdî ew nidikarin raya giştî ya cîhanê bixapinîn û ne jî dikarin raya kurdan a aştîxwaziyê û aşkerekirina derewên dewletê bigirin.
Di rewş û mercên wiha hesas, dîrokî û girîng de pêwîst e hemû kurd, hemû rewşenbîr û saziyên kurdan li dora hev bicivin, bibin yek û daxwazên xwe yên demokratîk bi dengekî hê bilindtir beyan bikin. Bila dîsa derfetên ji destê me neçin û em dîroka xwe dubare nekin.
Gelo em ê heya kengî dem û temenê xwe bi van durûtiyên rayedarên tirk, vala derbas bikin? Heya kengî em ê li wan binêrin ku bi keyfa xwe hemû cûre sivkatiyan bi netewa me bikin?
Ez bi baweriyeke bêdawî dibêjim ku: westandina weşana Azadiya Welat dê rûreşiyeke din li ser rûçikê dewleta Tirkiyeyê hilde.
Ji bîr nekin ku ronahiya momikekê di nava dilê hemû tartiyên cîhanê de nayê veşartin û winda nabe. Ew ronahiya kêm yê gur û gurtir bibe û bibe agirê canê hemû dagîrkerên Kurdistanê.
|
|
 Yazdır  Yorum Ekle
(Not: Yorum sadece üyeler tarafından yazılabılınır. Yazılan yorumlar yönetim tarafından onaylanmak için beklemeye alınıyor.) |
|
|
|
 |
| |
|
Kurdish
Turkish
Download
En Popüler
En İyi
Ekle
