Veke hemû çaviyên dilê xwe da ku jê biherikin hemû his û pêjnên nava te. Jê birijin hemû tirs û gumanên li nav herzêla dilê te. Hêmin be, netirse ji xwe, piştrast be; guhdarî bike li tîn û vejenga kûrahiyên dilê xwe.

Ji bîr neke, dil çu carê naxapîne te...

Veke çaviyên dilê xwe bila tê re biherikin hemû kaniyên dilê te yên zelal. Veke çaviyên dilê xwe da ku ji serekaniya çavên te bizên avzêlên boş. Asê neke çaviya dilî, berde bila jê hilbavêjin pêlên kenê, sîpelên bextewariyê û rûbarên hezkirinê.

Ji bîr neke, dengê dilî tim rastiyê dibêje.

Bi xwe bawer be; veke hemû çaviyên dilê xwe bila jê bifirin hemû ah û waxên te. Jê dakute hemû dû û dûkêla janan, jê birene hemû jeng û zengara êş û kovanan, jê vemale hemû gilêşê keser û eleman...      

Ji bîr neke, dil her tim dûv rêgeha rast diçe.

Veke çaviyên dilê xwe da ku ava heyatê biherike nav demarên zeviya dilê te û avîn bibe bi evînê, çîlên xwe tê de berde tovê hebûnê; da ku lê aj bide hezkirin. Lê bibişkive hêviyên herî mezin, şadî û kêfxweşiyên herî masûmane, xweziyên herî pak û paqij...

Dilêr be; veke hemû çaviyên dilê xwe da ku tê re bimeşin hemû însan, dinya, gerdûn. Bila bikaribin lê hilbên hemû reng û dengên jiyanê, bêyî ferq û cudahî bikaribin lê binişin hemû xwedanruh û zindewar...

Netirse ji reng û dengên cuda. Ji bîr neke, dewlemendiya te ye hemû xweseriyên jiyanê. Hînî pêkverabûnê bibe, bêyî ku rûyê xwe tirş bikî bizanibe daqurtîne pariyên tal ên jiyanê. Bila vekirî bin her dem hemû dergehên dilê te.  Veke, erê erê heta dawiyê veke hemû çaviyên dilê xwe, bila tê re bibezin hemû xweziyên dilê te. Bi ya dilê xwe bike ji ber ku ew baş dizane ka çi dixwaze ji jiyanê.

Ji bîr neke, dil çu carê derewan nake.

Veke hemû çaviyên dilê xwe da ku ava evînê tê re biherike ser dêmistan û çolterên dilê te. Çimkî kilîlka hemû genc û xezîneyên jiyanê yên mişt dur, almas û gewher di kûrahiya wî dilî de veşartine. Wê kilîlkê ancax tu keşf bikî, rêzanê/a jiyana te her tu bi xwe yî. Veke çaviya dilê xwe û xwe berde nav dehlîz û herzêlên wê yên herî nepenî; tu dê bibînî ku tu xwedan şiyaneke gelekî xurt î û ji bilî te çu kes nikare bibe serdarê/a jiyana te...

Ji bîr neke, dilê te roniya riya te ye, tenê ya ji te re dimîne ew e ku tu bizanibî çaviya wî dilî vekî û xwe berdî binê çal û herzêlên wî. Veke çaviyên dilê xwe da ku li nav evînê bigevizî.