Reva berev zerya direwan, ji bilî xapînokên qirase ne tiştek e. Ji kerema xwe re, direwan nekin. Rastgo bin. Xwe ji her celeb direw, hestên wehşî û rawirî biparêzin.
Rastgotinî ji bo her mirovî nifta deriyê gerdûna qenciniyê ye. Ji kerema xwe re xwe li peydekirina niftên ji bo deriyên kirêtî û neyîniyan neşidînin. Nebin peyrevên gerdûna gornebaş, gelacî, bêhiş, direwîn û giyanqirêjan.
***
Heke we niha lembeyê oda xwe temirandiye û hûn li muzîkeke ji malbata romantizmê guhdarî dikin, ji kerema xwe re xwe li melheziyên rawirî neşidînin. Lewra li ber muzîkên wiha têrerotîk ên pîrozwer, divê melheziya mizdana porê melodiya stranê were kirin. Divê insan melheziya vexwarina şeraba ku di kûraniya navika melodiyê deya bike û bi nazikî wê şerabê daqurtîne nava hinavên xwe. Xwe ji melheziya berdan û naskirina bihuşta melodiya stranê biparêzin. Lewra melheziyeke wiha, ji pîvanên ehlaqî dûr e û heke hûn welê bikin, nexwe hûn ê hem bibin zînekar û hem jî hûn ê bi vê kiryara xwe, pîrozweriya melodiya stranê bilewitînin.
Ji kerema xwe re, melodiyan nelewitînin. Bihêlin ku bila ew mîna xwe avzûnî bimînin.
***
Heke hûn niha li xwaringeheke li nik dildara xwe rûniştine û xwarinê dixwin, ji kerema xwe re melheziya fêde stendina ji jintiya wê nekin. Çimkî bêyî ku hûn li bihuşta wê bifikirin, hûn divê karibin hunera ziravî û romantîzmê bi wê bidin diyarkirin. Heke ev huner li nik we tune, ne dûr, hûn divê di wan kêliyên ku hûn li nik wê ne, karibin mejî û hişê xwe, bi peydakirina rê û rêbazên romantîzmê biwestînin.
Lê na heke ew huner bi we re heye, wê gavê hûn divê xwe ji hestên mêraniya ku di esasê xwe de rawirî ye bişûn û bi hestên xwe yên kedîkirî û avzûnî, nêzî wê bibin. Li dewsa ku hûn li bihuşta wê bifikirin, hûn divê jê re behsa delaliya lêvên masîgoşt, çavên yaqûtî, keziyên bi evdayên reş û kej ve xemilî, teyisîna stêrikên ku li ezmanê çavên reş û belek, biriqîna rûyê ava zerya dil û ya herî mihûm jî, behsa insanbûna wê bikin.
Hûn divê bi wê bidin diyarkirin ku ew jî bi qasî xwe heye û di tu warî de ji we kêmtir nîn e. Hûn divê bi nêrînên xwe yên nerm ên ku jê tîpên hezkirineke nedîtî dişûje, bi wê bidin zanîn ku ew ji gelek hêlan ve ji we zanatir û şarezatir e.
Hûn divê xwe ji awirên ku bes binyata xwe ji hestên mêraniya we ya ku di hundirê we de dinive û her ku we bi xwesteka peywendiyeke cinsî harokî dike, biparêzin. Lewra di zagonên romantîzmê de cihê awirên tûj û sitûr tune. Awirên tûj û tirî, ji bo kesên ku haya wan ji gerdûna romantîzmê heye, wek awirên lawaz û jaran tên dîtin. Kesên ku bi perda romantîzmê dizanin, xwediyê awirên tûj wek mirovên paşdemayî û nezan dibînin. Hûn divê rind bizanibim ku gav avêtina gerdûna romantîzmê, bes binermkirina awir, bi daxistina dengê berz û bi rawestandina hestên mêraniyê yên ku her dixwaze xwe di bihuşta jina li nik we de hesayî bike ve pêkan e.
Ji bîr nekin ku heke hûn ji her celeb melheziyên qaba û wehşiyane dûr nêzî dildara xwe bibin, ew ê pêtir deriyên dil, sîng û ber, bihuşta xwe ya têrgoşt a nerm û germ û bêhnkirina keziyên xwe ji we re veke.
Ew ê ji vê nêzikayiya we fêm bike ku hûn ne bi tenê ji bo fêdegirtina ji goştê wê li nik wê ne. Erê, ew ê fêm bike ku hûn bi rastî jê hez dikin û ev jî dê bibe sedem ku hûn karibin hemû tixûbên navbera xwe ji holê rakin. Jixwe piştî jiholêrabûna tixûbên navbera we, gerdûneke zeryayî we pêşwazî dike. Lê ji bo ku hûn karibin bibim serwerê gerdûna zeryayî, hûn divê hespê xwe bi mejî, bi hiş û bi pergal rakin çargaviyê. Çimkî gerdûna zeryayî ya ku bi embarên ziravî, xweşî û kamraniyê ve dagirtî, meşa hespê bêhiş, bêpergal û bêmejî napejirîne. Ji bo ku hûn karibin newala gerdûna zeryayî fetih bikin, hûn divê hespê xwe bi nazikî biajon ser berzên wesleyên din yên gerdûna zeryayî. Heke hûn vana bikin, nexwe hûn ê pir bi hêsayî bikaribin li textê dilê gerdûna zeryayî rûnên. Bi vê kiryara xwe, hûn ê bibin mîrê dilê wê yanî dilê gerdûna zeryayî.
Ji kerema xwe re, ji bo xatirê evînê vana bikin. Bila evîn û evîndarî nemire. Bila pîrozweriya xwe kuta neke. Ev erk, erkeke xwedayî ye û divê hemû kesên ku ji xwedatiya evînê bawer in, li gorî qeîde û pîvanên wê tevbigerin.
Berdewama nivisê ji bo careke din... Bi silavên hezbar Firat Mîrqasimlo.
|
|
Kurdish
Turkish
Download
En Popüler
En İyi
Ekle
Yazdır
Yorum Ekle 
